كيف تصبحين مزه في الصور؟

كيف تصبحين مزه في الصور؟

"آه يا ريت البنات يعرفوا إزاى يبقوا مزز بدل التلوث البصرى اللى بنشوفه".. كلمة أجمع عليها كل البنات اللى قابلناهم، طبعا محدش فينا يقدر ينكر أن الجمال نسبى ودى فى الأول وفى الآخر خلقة ربنا، بس كمان مينفعش ننكر إن مفيش بنت وحشة ولازم كل بنت تكون حلوة بطريقة  ما، وشطارة البنت إنها تبين جمالها، بس للأسف فى بنات كتير أوى مش بيعرفوا يعملوا ده، وإحنا النهارده بندى tips صغيرة كده للبنات المحتاسة، إزاى ممكن تكونى مزة بجد وإزاى تبينى جمالك وتلفتى الأنظار.
شاهندة حسام، منة زاهر، سارة شريف، ريم محمد، بسمة بدر، نيفين حسن وضحى أشرف، ادونا الخطوات وقالولنا إن البنت لو مهتمة فعلا تكون مزة لازم تمشى عالخطوات دى ماتلخبطهاش وماتجّودش من عندها.
- انزلى اشترى لبس لايق عليكى، مش تشترى لبس عالموضة وخلاص عشان مش بتليق عالكل، اللبس الحلو اللى لايق عليكى هيخليكى مزة أكتر من أى موضة.
- لو إنت مليانة، ده مش عيب، العيب إنك تفكرى إن اللبس الضيق بيبينك ارفع، ده حضرتك بيخلى شكلك مقزز، وبالذات لو انتى محجبة، احترمى حجابك.
- بمناسبة الحجاب بقه، الخصلة اللى مضروبة أوكسجين دى ومحروقة من السشوار عمرها ما هتثبتلنا إنك blonde ولا شعر حضرتك حرير، خبيها تحت الحجاب، إذا بليتم فاستتروا.
- وأنت بتشترى ماكياج افتكرى إن هدف الماكياج إنك تخفى الديفوهات وتبروزى جمال ملامحك، يعنى ده مش وسيلة عشان تحولى نفسك من بنت لأنثى خرتيت.
- خلى بالك وأنت بتحطى كريم الأساس، ماينفعش يكون وشك إيمان العاصى وايديكى شيكابالا.
- وشك مش دفتر تلوين، الألوان الكتير دى ماتعمليهاش فى وشك مراعاة لعيوننا.
- خلى بالك إن فى فرق بين ماكياج الليل وماكياج النهار، وكل ما كنتى بسيطة كل ما كنتى مزة أكتر.
- بيقولك لكل مقام مقال، مينفعش تروحى الجامعة بكعب عالى جدا أو بهدوم سهرة.
- اهتمامك بضوافرك شىء أساسى، يا تقصيهم خالص يا تحافظى على نضافتهم.
- ختاما، أهم حاجة اهتمامك بنضافتك الشخصية عشان ماتبوظيش كل اللى فوق ده.